Nou sa asiz é lès lo bann fast-food pran toute la plas la Rényon ?
Non ôté ! Kan nou agard bien, nou wa ke se bann fast-food la i manz ti pa ti pa nout ti péï. Bana la pou kit nout bann restoratèr tradisionèl kréol dann malizé. Pli zan plis nou wa so bann ti zantropriz tak la port parské zot i giny pi rivaliz kontr so bann gro zozo.
Nout san i fé in tour kan nou wa ke lo bann fast-food la miltiplié par dé an moin din an dann la vile Sin Pièr! I amontr a nou bien ke bana lé an trin pran in pli gran plas dan lo paysaj Rényoné. Néna plis fast-food jordu la Rényon ka Paris, proportionèlman a la population ! Zot i rann azot kont in pé ! Ôté ousa nou sava nou la ?
Sèt lé pir andan la, sé kan nou wa ke lo bann otorité lokal, i lès fèr so bann gro zantroprize instale azot desi nout ti péï, desi nout fron dmèr. Tousa la i transform nout zalor, nout lidentité !
La kriz lo kovid la pa non pli èd anou, zot lé dakor ? Lé dé dèrnié zané i viyn pasé la bien amont anou ke nou lé anshéné po nou trouv in boushé manzé parské nou la bezoin in tralé zafèr i sort deor. Lo bann restoratèr péï osi lété dann malizé pandan se kriz la. Jordu zot i giny pi rivalizé ek toute se bann fast-food ki instale azot.
Isi la Rényon, fo pa oublié osi néna in tralé dproblèm santé. Lo diabèt, l’ipèrtansion, lobésité i donn paké é i trakas anou bonpé. Zot i majinn bien ke lo bann fast-food i èd pa nou dutou ?
Sat lé pa gayar, sé kan nou koné ke se bann gro zozo la i mèt dann malizé nout natur, zot i gaspile bonpé manzé. Zot bon dié sé lo plastik an ponyé, lélevaj intansif, l’inportasion an ponndiak, zot stratéji markéting, zot bann publisité i agrès lo zié. Ala kosa nou lès pran la plas la rényon !
Mé pou kosa nou lans so lapèl ? An fin d’kont sèt nou ve, sé engaj anou pou la proteksion é la présèrvasion de nout gastronomi péï. Nou vé mèt an lèr nout kiltir ek nout lang kozé. Nou vé batay pou la produksion lokal, po in sirkui kour ek lo bann produi la kour. Nou vé soutien nout modèl ékonomik, an komansan du produktèr jiska lo bann restoratèr.
Sèt nou vé sé mèt an lèr nout zarlor : la kuisine rényoné.
Alor kwé la fé ? Zot i retrouv azot ann dan la ? ésite pa vien don la min pou frènn se bann gro fast-food ki trap déja in tralé la plas dann nout ti péï ! Rejoign anou po fé in piknik partaj lo 3 Septanbr dovan lo nouvo mak do sin pièr !
Nou lé pa plis nou lé pa moin, vien azot pou fé respekt anou !